蕭正楠同黃翠如今日「情侶檔」喺旺角出席家品店開幕，擔任司儀嘅小儀問佢哋有冇幻想將來嘅家係點？蕭正楠聽到就係咁笑，黃翠如問：「做乜笑得咁開心？」蕭正楠冧笑咁望住女友話：「最緊要有你喺度！」事後黃翠如笑言：「佢需要個傭人啫，聽到都打冷震。」蕭正楠即指自己係衝口而出。

問到有冇睇大床？黃翠如表示：「向來都鍾意睇傢俬，就連去旅行都會買家品，o依家好多叉同碟。」蕭正楠即指：「買到兩個篋都爆晒，多到可以開餐廳。」問蕭正楠咪銀包大出血？佢透露兩人嘅財政係獨立，笑指女友好強悍。係咪婚後先用佢錢？蕭正楠笑住話：「希望佢使到啦！」會唔會狗年結婚？佢哋表示今年忙到飛起。

至於情人節，蕭正楠要工作中度過，有假放嘅黃翠如，就會同家人一齊去旅行，佢話：「對上一次一家人去旅行已經係10年前。」蕭正楠唔係家人咩？黃翠如笑住話：「佢未有份，我哋好少見，未蜜月已經過咗蜜月期。」蕭正楠笑謂屆時唯有打搞曹永廉。

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent