繼續都係洗米華時間！

上回講到洗米華周日(13日)已經動身飛過倫敦，主打當然係見喺倫敦紮根嘅 Mandy Lieu，亦為嚟緊正印洗米嫂陳慧玲、異性朋友松岡李那喺當地「世紀團聚」作準備。

話咁快，噚晚，就有讀者速遞洗米華同Mandy Lieu喺倫敦嘅新相俾《蘋果》，相中見到肚凸凸似有咗5個月身己嘅Mandy，拖實洗米華隻手行Nike專門店。

究竟Mandy係咪三年抱三，暫時未知住，不過今日就有周刊報道洗米華自從6月喺安以軒婚禮上，醉攬松岡李那後，遠在倫敦湊仔嘅 Mandy，即時火燒心嬲到震，更出埋口嗌分手。為安撫 Mandy，洗米華罕有出聲明稱松岡只係異性朋友，劃清界線，繼而又親自飛倫敦o氹 Mandy。

為表忠貞，洗米華仲走去紋身，喺左手手臂內側紋咗「I will honour and love You Forever」下款就紋咗 M.W.，M就好代表Mandy，W就係代表洗米華，意即洗米華對Mandy永遠尊重同愛佢，真係堅…堅肉麻，難怪Mandy收晒火。