鄭裕彤四位子女為紀念父親，邀請兩位社會及歷史學者王惠玲及莫健偉，為其撰寫《鄭裕彤傳》，歷時四年終於面世。《鄭裕彤傳》琴日喺尖沙嘴舉行新書發佈會，同時分享由搜集資料至撰寫成書嘅經驗同想法。

彤叔入醫院照打牌

華華揭開本書，彤叔嘅生活點滴同商場風雲都寫得好詳盡，最特別係搵來佢好友李嘉誠寫序，將兩人友情刻劃得相當深刻。誠哥指自己同彤叔認識40年，雖然性格唔同，但欣賞佢誠懇、寬和、豪爽同唔計較。誠哥話有次賣地，佢坐彤叔旁邊，誠哥覺得太貴已經停手，但彤叔仲舉手叫價，誠哥忍唔住按住彤叔隻手問點解仲追價，彤叔先講佢背後有長期投資「大水喉」。雖然塊地最後投唔成，但誠哥深深佩服佢籌謀。

兩人又相約每周打牌，由於誠哥作息稍早，入夜前就離席，而彤叔係「夜貓」，所以彤叔刻意約周末下午，誠哥深受感動，後來誠哥聽聞彤叔入院，立即放低工作，趕去醫院，竟然發現佢同幾個牌友在麻雀枱打牌，一向正經嘅誠哥都笑出嚟。再後來誠哥回憶見彤叔最後一面，諗起醫院打牌一幕，相視而無語，友情只能永藏心臆。

李華華
mailto:[email protected]