盧凱彤（Ellen）去年俾愛港力召集人陳淨心喺微博舉報，話佢曾經綁黃絲帶演出，結果搞到Ellen冇得做內地音樂會，所以對於好友何韻詩最近俾Lancôme取消演唱會，都感同身受。
Ellen前晚同樂隊Supper Moment及Yellow！（野佬）為中環海濱活動空間舉行嘅「香港龍舟嘉年華．生力啤酒節」音樂會表演，講到何韻詩同Lancôme事件，Ellen話一直有留意：「呢件事個人絕對支持何韻詩，其實唔止一次有藝人因為政治矛盾而被取消演出，自己都試過，今次唔單止係一個矛盾咁簡單，上埋國際新聞。其實呢一、兩年以嚟，好多細矛盾累積而成，一次爆發。」

去台灣住

Ellen希望大家要正視問題：「品牌都係受害者，大家都好珍惜大家擁有言論自由，都覺得呢種係白色恐怖，只需要諗深一層，為下一代着想，先會堅持，唔退縮。」Ellen話自己近年喺內地冇工作，都好想返內地演出，珍惜內地歌迷，而一直都有同何韻詩聯絡，知佢堅持自己諗法，唔會放棄發聲機會。另外，Ellen嚟緊會移居台灣，但會香港、台灣兩邊走，佢話：「台灣係住多，錄碟都會返香港，廣告商可以搵我返嚟做嘢，遲啲錄國語碟先會留喺台灣耐啲。」
撰文：馮仁昭