小小超私有化電盈，遭小股東批評唔公道，有人改寫容祖兒金曲《我的驕傲》諷刺小小超，呢首歌仔近日網上廣泛流傳，可見有人確係犯眾憎到極，連社聯主席陳智思都受牽連。
因為社聯前日頒發「商界展關懷」獎狀畀電盈，裁員、減薪又虧待小股東都竟然係良心企業，令人嘩然，陳智思俾人鬧到暈，佢話其實對電盈所為不以為然，又笑言今年攞獎嘅公司唔好太高興，事關日後不能隨便裁員，否則付出商譽代價可能好大。

練乙錚暗示隨時起身

電盈成為眾矢之的，唔加入鬧爆行列都可能變成人民公敵，小小超嘅《信報》被質疑報道電盈私有化時小罵大幫忙，主筆練乙錚亦受牽連，《信報》編輯部發出聲明，指從來冇為記者、編輯同作者設下採訪報道同評論嘅限制，總之以事論事，不煽情。
練乙錚噚日喺專欄度表態，話因為成件事冇政策涵義，亦同政府施政無關，所以冇興趣評論。佢又話如果證實「種票」係李澤楷或盈科高層授意，佢樂得早點「復得返自由」，又話好懷念看海的日子，似在暗示可以隨時起身。

《電盈之歌》

寄調《我的驕傲》
Priceinyourvotes　為我改寫下半生
雲霧裏　找到我　失去的　萬八金
難明白　被騙的　能活得這樣勇敢
誰讓法律能與佢　蒙混過程來甩身
Seehimfry,he'sproudtofryuphigh
不因種票搖擺　只因佢有錢派
Believemehecanfry,he'sfryingitskyhigh
假使佢算神話　因數碼港大晒
（假使佢有成績　咁你才最愉快）
Priceinyourvotes,numbereight就像最初
唯獨佢　偷取我　股票　套現
人疲累　願證監　能為我覆核訴寃
難論有罪誰對錯　程序卻無人可阻
我盼有一天將佢挖地埋
昂然地對佢老竇說　是借着你歪風
佢覺得光榮私有化……叻晒