當年今日
關於我們

馮仁昭四圍超:亞視減薪逼走一哥 陳啟泰過檔有線 - 馮仁昭

蘋果日報 2009/08/15 00:00


亞視為求縮皮,近日不停高壓要求藝人重新簽新合約,大幅度減騷錢同騷嘅數量,新制唔單止要向就嚟約滿嘅藝人開刀,就連已經簽咗合約嘅藝人都唔放過,要重新再簽新約。有亞視一哥之稱嘅陳啟泰向來騷錢唔平,新制中人工會唔見一大截,所以阿泰呢個月約滿已經決定同亞視拜拜,有消息指佢會跳槽有線。馮仁昭仲聽聞有新人被擠壓到6,000蚊月薪任做無限騷,認真難撈。
阿泰過檔有線,其實有迹可尋。佢雖然喺亞視地位超然,大騷必定有份,但曝光有限,令佢做到好無癮。自從早前開始為有線娛樂台主持節目《神探CSI》後,固定每星期都有節目,令阿泰越做越起勁,而且雙方合作又開心,呢次亞視減薪潮,正好造就佢轉投有線。
empty
近來陳啟泰(右一)幫有線主持嘅節目《神探CSI》反應都唔錯,所以有線都想搵佢合作。
empty
以往亞視大騷都會例必有陳啟泰做主持,奠定佢喺亞視一哥之位。
唔接受減薪一半
阿泰坦承同亞視呢個月底就約滿,下周三(19日)開始,佢同黃宇詩合演7場音樂劇《仙樂飄飄處處聞》,呢排阿泰忙緊綵排,完全冇時間返亞視傾約。馮仁昭噚日打畀阿泰,問佢係咪離開亞視?佢話:「咁好?不過,我暫時同亞視都未傾過,如果減薪一半就冇可能,我要考慮好多有關前景嘅嘢,我家唔係退休年齡,唔可以靠幾十蚊過活。其實我係唔介意以自由身形式同亞視合作。」
此外,亞視高層葉家寶噚日接受商台節目電話訪問,佢再次為亞視減薪解畫,除咗繼續堅持係減騷唔係減薪外,仲話希望積極發揮亞視嘅經理人部門,等旗下藝員能夠多啲工作機會,佢話:「好似之前都曾經將陳啟泰借過去畀有線,藝人有啲地方可以互相共用,希望將來可以改變香港咁特別嘅簽藝人政策。」