「究竟佢哋幾時衝o架？」香港人冇嘢叻，最叻做花生友等睇戲，由天星爬上推土機到反高鐵包圍立法會，好多人見到後生仔同警方對峙覺得過癮，見到民主女神最留意事業線，卻從來冇問其實佢哋做緊乜？掛嚿豆腐喺中聯辦門口做乜？點解要喺立法會門外寫粉筆字咁「暴力」？維園阿哥喺邊度走出嚟？今次書展，新一代社會運動員終於開口講說話，親自解開呢個謎團。

撐開新天地

「想當然」係人類天性，衝鐵馬一定係暴力？瞓馬路仲唔係滋事分子？嶺南大學文化研究系講師葉蔭聰最近出咗本書叫《直接行動》，希望青蛙知道自己喺井底，從今日起奮力撐開新天地。
新書由1971年反越戰團體MaydayTribe講起，噚日新書發佈會，社運界齊齊撐場。FM101嘅梁穎禮講直接行動，話自己唔係鐵血戰士，又唔係義和團神打上身，搞抗爭講到尾都係用番自己嘅身體，俾警察打，透過呢個矛盾，凸顯個議題出嚟。
80後反特權青年成員葉寶琳就話，與其寫信去報館等石沉大海，向議員求助吃閉門羮，不如自己直接行動。佢話03年7.1有50萬人上街，事後政黨成日講遊行和平理性，無打爛一塊玻璃，好似只有和平理性先係唯一抗爭方式，令佢好不安。

對手係政府

家係理大專上學院社會學老師嘅陸潔玲，係上一代滋擾性社會行動策劃人，佢話直接行動唔係新嘢，當年佢都試過用banner包圍當時嘅房委會主席王䓪鳴架車，用口水直接申訴，結果成功爭取接見。
陸潔玲話家啲人遊行，對手係政府，根本摸通晒示威者嘅底，好明白你嘅方式，每次都係和平散去，最多都係估你用苦瓜定係用菠蘿做道具，就刺激唔到制度改變。
除咗《直接行動》之外，人氣爆燈嘅屑醫生同馬草泥亦都會喺今次書展推出《爆政．維園阿哥》，7月22號下晝兩點喺書展仲有簽名會。之前撐公投，畫咗一系列講解公投漫畫嘅Cuson，今次都有參與書展，自畫《我的港女老婆》，7月23號晚7點簽名會。

mailto:[email protected]