蔡素玉平時畀人嘅形象，係成個師奶款，鄉音不改。一位香港大學七三年畢業嘅中環人曾經同左丁山講：「若果當年唔係同蔡素玉一齊上過堂，我打都唔信，佢會識講識寫英文，重以為佢係來自福建嘅新移民㖭。」
哈，蔡議員一係唔講，一講就驚人，個個注意，蔡議員竟然罕有地應香港電台英文台之邀，寫封《LettertoHongKong》，單打曾爵士一輪，話佢沙塵兼好命，竟然可以做到特首。英文《香港家書》素來只係劉慧卿、李柱銘等人嘅影響力範圍，蔡議員同佢哋揮一揮，搶番個輿論地盤，好應該啫，遲搶好過唔搶。

識得曾爵士嘅商界老友，又唔多覺得爵士沙塵噃。中環Ｂ到大球場睇七人欖球賽，碰到曾爵士署理特首到場主持頒獎儀式，互拍膊頭，寒暄幾句，爵士完全冇擺款啫，幾客氣呀。中環Ｂ之公子在旁見到，對中環Ｂ講：「爹哋，原來你真係識得曾司長㗎，幾巴閉喎。」Ｂ公子與有榮焉，中環Ｂ為之大樂。
一班老友知道中環Ｂ人面廣，有頭有面之人，佢無所不識，點解佢位公子會講：你真係識得曾司長呢句話㗎，唔通平時以為老竇一味吹牛？中環Ｂ話：「真係㗎，佢成日以為我指住電視機上出現嘅知名人物，識呢個，識嗰個，係亂咁吹啫，大球場上佢見到曾爵士同我打招呼，先至知道老竇平時講嘢真真正正冇花冇假。」
兒童心理原來如此。行街黃叫我哋買隻DVD——《BigFish》（大魚奇緣），佢誠意推薦呢套好戲，內容就係講父親生前猛講生平威水史，兒子半信半疑，認為老頭子言過其實吹牛過甚。及至父親去世，出殯之日，到場行禮嘅猛人，數目多到數唔晒，兒子方知老頭子生前事迹之真真假假。行街黃話為人父者，此戲不可不睇，等左丁山去搵吓隻DVD先。