有柔道教練投訴，與中國香港柔道總會（下稱總會）合辦興趣班，卻被拖「車馬費」，約一萬三千多元，屢次查詢追討仍無結果，令其氣結。法律界人士指，由於雙方不存在僱傭關係，最終可能要透過小額錢債審裁處追討。

「一直唔交代」

柔道教練徐先生表示，自05年1月開始，教授一個兒童柔道興趣班，每月應可獲九百多元「車馬費」。他說：「呢個元朗少年警訊柔道班係我同總會合作開嘅，按合作協議總會要每個月畀番九百幾蚊『車馬費』，但自05年4月起至今，就未收過錢，問過總會好多次，唔係話負責人帶隊出外比賽，就話會計未計好。
徐先生不滿總會之處理手法。他說：「教小朋友柔道，都係為咗培養下一代同自己嘅興趣，就算要做義工都冇所謂，講明咪得囉！𠵱家總會一直唔交代清楚，即是對人好唔尊重，有乜理由成年都未計好數？」　
就此投訴，本報曾多次聯絡柔道總會了解，但該會發言人指，已向徐先生交代，不會向媒體作任何回應。不過事後徐先生說：「係你哋報紙同我投訴後，總會先肯搵我，出番份紀錄，話仲有幾多堂未畀錢，但究竟幾時畀番就冇提過，淨係話遲啲！」
檔案編號：0609035

法界意見：可透過審裁署追討

法律界人士謝天良指出，柔道總會與教練開辦柔道班，可能不存在僱傭關係，即使如此，投訴人仍可追討被拖欠的「車馬費」。他說：「通常呢種情況，雙方只係合作關係，被欠嘅『車馬費』攞唔攞得番，要睇當初大家有乜合作協議同證據，例如曾經收過總會發出嘅『車馬費』支票，只要同銀行攞番個入數紀錄，都算係證據，涉及款項唔超過五萬元，就向小額錢債審裁處申請追討。」

蘋果投訴熱線：29290000
社會服務熱線：29908288
傳真：23702192
電郵：[email protected]