早前有「民間特首」之稱嘅劉德華幫董建華個團結香港基金聲演撐填海同起人工島，事後俾好多保育團體批評，話佢未搞清楚計劃對海洋有幾大損害同要用天文數字公帑去搞，就唔理後果盲撐。唔知係咪要平衡返民間特首嘅影響力，漁護署近日整咗條片宣傳珍惜香港大自然物種、包括最受填海影響嘅中華白海豚，仲特別搵「音樂情人」鄭子誠聲音導航。

網民：鄭子誠把聲好治癒

雖然好多網民成日講笑，話鄭子誠一出現就肯定有陰謀，但八方好肯定佢今次冇陰謀，仲化身做「生態情人」，為漁護署短片《大自然的情歌》聲音導航，漁護署仲喺facebook以「生態情人鄭子誠深情演繹」去sell呢條片。
鄭子誠喺片入面講香港人生活喺繁囂嘅都市中，樹木林蔭嘅郊野同海邊可以令佢哋停下嚟，又形容自己做「生態情人」，話香港得天獨厚，各個生態環境孕育出豐富物種，片入面仲有因為大嶼山填海而瀕危嘅中華白海豚，認為唔應該遺忘身邊最寶貴嘅大自然。鄭子誠仲喺片末提醒大家，佢只係想人人珍惜大自然：「講咗咁耐，其實我冇乜嘢陰謀，其實只係想提醒大家，千祈唔好遺忘，香港咁美好嘅大自然。」
好多網民留言大讚漁護署真係冇搵錯人，話鄭子誠把聲真係好治癒，亦有人話條片好正，好想forward畀贊成填海嘅人睇，但更多人留言讚鄭子誠今次真係K.O.民間特首，「我正式宣佈，鄭子誠>>>>>劉德華」、「第一次覺得鄭子誠勁過劉德華」，如果大家想睇條片，只要去漁農自然護理署 facebook就睇到。

李八方