中門大開:毒Spin - 添馬男
梁振英日前於屯門的親民Show由建制派議員主場,連民主黨區議員都入唔到場。
曾蔭權任內被傳媒批評,除了親疏有別,就是政治化妝。
但如果按照同樣標準,傳媒應該對振英更反感。首先在親疏有別執行層面,振英更明目張膽。介紹新班子記者會上,反斗《蘋果》記者舉手也未被主持點中發問,要發晒爛渣先至臨尾問到。
至於上任後的親民Show,一改以往由政務官主持,改由建制派議員,美其名是區議會主席,眾所周知18區區議會主席都係建制派議員出任。屯門那場連民主黨區議員都入唔到場,民協亦如是,街坊是一車車送來,劉皇發點名提問大部份是這類街坊,令在場青年學生反感才發難衝擊。
一場親民Show如果由政府主場,點可能泛民政黨冇法入場,如果真係要執行親疏有別,就應由建制政黨作主場,邀請特首到場去接見群眾,訪貧問苦。振英一上場就打爛了公務員政治中立齋缽。
第二樣衰係政治化妝,水平低、毫不專業。張震遠話7.1大批群眾上街支持求變,指鹿為馬,人人喊打。振英本人亦經常Spin記者,選舉期大批前線記者中招,正由於佢Spin得太成功,種下日後禍根。選舉後期唐唐擲出兩枚手榴彈同歸於盡,已令振英誠信受質疑,「你呃人」金句入晒腦。跟手好搞唔搞,有老人金唔做,將黃金100日走去搞五司十四局重組,陷入政治泥沼之中。
跟手李旺陽左閃右避,再爆豪宅僭建,昔日受Spin之記者終於明白過去振英好感是中了政治化妝術迷惑,那種情感受騙之反撲,力度很大。
振英惟今之計,是立即停止一切政治化妝工程,抹去厚粉,先交出成績來,再乞求巿民諒解。如果佢仲係用「梁營」競選中的心態去做特首,我擔保明年7.1,由鍾庭耀去數人頭,都數到50萬人上街。
老董下台,並非03年7.1的50萬群眾,而是到04年7.1,仍有50萬人!
添馬男