歌手鍾舒漫（Sherman）今日喺黃埔接受新城電台訪問，最近Sherman好鍾意拍片放上網，主題都係生活化日常會發生嘅事，而最新一條就係自嘲皮膚黑嘅佢所碰過嘅趣事，Sherman話：「 同事提出呢個題目，我最有資格，唔係平反，我天生皮膚黑，只係講出自己嘅心聲。」

因為天生皮膚黑，Sherman都遇過唔少尷尬事，例如不下數次畀人誤會係外籍人士，佢話：「當中有泰國，菲律賓同印尼都有，影相就要就人，因為對焦對住我，其他人就會曝光，所以影相，我實係最黑嗰個。」

講到湯怡中學時期都係黑妹，湯怡話當時自己冇市場冇人追，Sherman就話：「佢黑都係咁靚，唔好咁睇，黑都有市場嘅，有獨特嘅美。」佢仲話有男仔欣賞自己黑皮膚，係表示好接納自己咁話。