時間：2000年8月1日

地點：灣仔金紫荊廣場

人物：白韻琴、謝偉俊

經過：專業人士好緊張自己嘅形象，不過自從謝偉俊（阿Paul）同白韻琴拍拖後，佢嚴肅嘅律師形象變得好出位。除咗大家記憶猶新阿Paul赤裸上身影宣傳照外，仲一定記得佢苦心經營嘅「法律超人」形象。佢2000年參加港島區立法會直選活動，着咗套超人裝去拉票，由於下身嘅三角褲好緊，出現激凸嘅尷尬場面，難得阿Paul依然大方任影，仲成日擺飛翔嘅甫士，現場仲有樂隊高奏國歌同埋《龍的傳人》，助選團又吶喊助威：「夠精、夠勁、夠勇。」
其間阿Paul又將超人衫拉到腰間，白姐姐就仿效岳飛阿媽喺佢背脊用紅色油彩寫上「精忠報港」，為咗影相，白姐姐寫呢四隻字仲用咗成15分鐘。阿Paul話：「法律超人嘅概念係超人鋤強扶弱，係正義嘅化身，我冇逢中必親，又或者逢中必反嘅立場。」講句真心話，作為選民都冇理由會選個小丑去為民請命，阿Paul落選係意料中事。
呢排白姐姐同阿Paul低調咗好多，佢哋日前拍拖出席派對，阿Paul唱多首懷舊英文歌，聽講有旅行社老闆想搵佢出碟，呢排連環揭發內地旅客嚟香港購物買到假貨，白姐姐即刻猛sell男友話如果阿Paul肯唱，就會搵專人填詞。只怕佢哋形象太過標奇立異，弄巧反拙。
本欄逢周一至周六刊出