新勝馬於這晚（20日）谷戰表現突出，頭場「自由飛翔」及第四場「埼豐」分別取得跨季及今季連捷。

到第六場四班1650米，再有方嘉柏及潘頓合作馬「事必獲利」連捷於谷草一哩，此駒與「埼豐」一樣季內兩戰全勝，「事必獲利」單Win及組合獨贏A2分別派44及15.5元。

講際遇潘頓今晚都算先苦後甜，佢於第三場搏輸熱門「滿貫中環」做二奶，第五場起就以容天鵬馬房「幸運興隆」及方嘉柏「事必獲利」呢對熱門包辦第五口孖寶，從而在新季首嘗起孖滋味。

升上四班的七歲馬「事必獲利」今場沿途居中後位置，直路連追多駒贏1.5馬位，馬兒上季頭三場取兩冠一季，今季開局則連下兩城，不愧為季初之星，而方嘉柏季內暫兩勝谷草，均由呢匹七歲馬經手。

方嘉柏表示今晚派出多匹實力馬出賽，原本有一定信心接連建功，怎料部份戰馬排外檔形勢不利，交不出水準，幸好「事必獲利」克服9檔劣勢，潘頓留前鬥後亦發揮一流，值得一讚，希望馬兒今季可取得3捷。

第六場賽果偏熱，亞、季軍「教主」及「威震天」同「事必獲利」一樣都係熱門，第四名則由落飛冷馬「華美之寶」拎到，四重彩派一萬九千幾。三T中獎有人中，每注派21萬幾。