北京嘅「紫禁城」，有名你叫，「禁」區多的是，深宮神神秘秘，毗鄰軍政重地，所以敏感非常，只有四分一開放畀你睇。但有位老外法國藝術家喬德龍（CharlesChauderlot）好威水，阿爺睇中佢水墨畫功了得，御賜佢一張禁區紙，放佢入禁區實地畫畫兩年。雖然唔可以影相，但老喬不負所託，畫咗81幅紫禁城「禁宮水墨畫」，透過畫展，大家可一窺深宮禁地。
現年59歲嘅老喬，15年前由法國去到北京，揸住叠法國靚紙、中國筆墨，透過黑白水墨畫，畫盡北京老胡同，名畫聲名大噪。「得龍」因而得寵，02年獲北大人賞識，由北京老街飛上枝頭被召入宮，由「北京胡同畫家」變身為「紫禁城水墨畫家」，「我係唯一一個有准許證，可以喺紫禁城任何地方畫畫嘅藝術家，中國嘅藝術家、記者申請都唔畀呀！我張證個冧巴係001，勁過JamesBond嘅007！」真係得戚得佢！

佢啲水墨畫有乜咁巴閉？只有高官、侍衞可以走嘅東華門、貯藏珍寶嘅寶蘊樓、1813年宮廷叛變留下箭頭遺蹟嘅隆宗門、擁有淒美傳說嘅八寶琉璃井……紫禁城禁區因為一個老外喬德龍，大家由無得睇變成有得睇。「中國傳統嘅水墨畫大多係平面，但我會用黑白兩色，畀大家睇到景物深度。」簽過一份承諾書，喬德龍應承只畫畫，在宮中睇到、聽到嘅都不能透露。

出入深宮兩年，老喬指紫禁城建築宏偉，但覺得喺入面生活則係另一回事，「紫禁城好多地方都係俾6至8米高嘅磚牆圍住，我睇過書，知道當年住喺呢度嘅人好唔開心，好想離開紫禁城，見吓出面個世界。」
老喬畫水墨畫，原來有段古。年輕時，佢做過律師、保險公司主席，秒秒鐘「印銀紙」，直至1989年，37歲嘅喬德龍車禍昏迷3個月，頓覺人生苦短，應及時行樂，既然自己天份同理想都係畫畫，所以將passion變profession。想睇老喬嘅81幅紫禁城水墨畫，要「過大海」去澳門美高梅MGM，展覽今日開始至下月16日，免費嘅。

mailto:[email protected]