今屆區議會選舉入面，憑手寫政綱、完全冇參選經驗嘅素人陳梓維，竟然擊敗民建聯嘅油尖旺區議會主席葉傲冬，成為佐敦南候任區議員。自從陳梓維當選，好多藍絲完全接受唔到事實，於是不斷係網上唱衰佢，反而令佢越嚟越出名。就好似陳梓維前日去海港城做直播，有差人學藍絲咁走去寸陳梓維，點知反而露底，話畀人知香港警察唔識字原來係真，唔係扮出嚟！

海港城平安夜爆發警民衝突，陳梓維當時亦在場，佢唔單止用手機做直播，畀街坊知海港城最新情況，仲希望有候任區議員在場睇住差人，等佢哋唔好濫用暴力。

《蘋果》記者見陳梓維喺現場，梗係問佢兩句。訪問期間，有個防暴警員認得陳梓維係候任區議員，要求佢「控制、處理現場環境」。陳梓維話警員呢一番說話即時引起全場哄動，最後呢名警員就自己退至商場出入口處。

笑人會考0分自暴其短

不過，最精采係訪問完結後，又有警員走去陳梓維面前手指指話：「呢個就係會考零分都做到區議員嗰個人。」但最慘係呢個差人話陳梓維會考零分，但佢就將陳梓維個名入面「梓」（正確讀音：子），讀咗做「辛」，連直播中嘅陳梓維都要即場糾正佢。個差人懶醒笑人會考零分，點知自己嘅中文仲差過考零分嘅人，完美地真人示範毅進警真係唔識字㗎！

李八方