【一人一日】林海峰用屈原暗示犧牲者人數：全年可能返幾日工
蘋果日報 2019/09/19 22:17
林海峰是但噏
（攝影：曹家誠、王連連）
林海峰今晚開騷，他在開場後除了指有「一個人」令全香港人不開心外，亦表示自己最期待的假期是端午節，他說：「端午節係紀念愛國詩人屈原投江自盡嘅一個節日，如果有一個人犧牲，你都有一日假期，我相信喺香港不久將來，全年可能返幾日工。」
林海峰之後指放假是香港人的核心價值：「香港嘅核心價值除咗自由、民主、人權、法治、廉潔之外，最重要就係放假返鄉下，呢個係非常之重要。所以我哋見到嗰啲表達自由、言論自由，甚麼嘅自由被收窄，慶幸我哋仲有放假返鄉下嘅自由，萬一呢個核心價值都被攻陷埋嘅話，不得了，唔係講笑，下次畀你去日本，但淨係畀你去日本機場，然後原機折返香港問你死未？再嘈再收窄，下次淨係畀你去『激安』，香港嗰間。」
林海峰指以往看到很多香港人在爭取不同的東西時，用了不同行為、行動，結果也有很多犧牲，他說：「再咁犧牲落去其實都唔係辦法，但如果再迫到埋身可以點樣？去盡啲，叫做咩呢？如果再迫埋嚟嘅話，就係一個『極端超級無敵super不合作運動』，咩叫『極端超級無敵super不合作運動』呢？就係自己同自己過意唔去，OK？舉例，下次你返工，突然間8號風球，你有假期㗎嘛係咪？唔放假照返工，嗱，有假唔放照返工，呢個就係香港人最後嘅犧牲，爭取到啲乜我唔知，但相信差人唔會拉嘅應該，唔係嘛返工都當我非法集結？」觀眾聽完即時大叫兼鼓掌，林海峰續說：「喺香港返工係天經地義，唔返工係天地不容，有假唔放照返工你都拉就真係天悼英才。」
林海峰又提到當年的無綫劇《新紮師兄》：「1984播《新紮師兄》，我當年真係有諗過做差人，我真係諗過做到，當年個個同學勤力讀書，做醫生、律師，我都勤力讀書，不過我成績唔好，入面嗰個張偉杰只係得中三程度，我睇嗰時係中四，多佢一年，同埋我睇嗰時，佢只係跑下步、敬下禮咁就做到差人。最重要係教我哋孝順父母，佢叫蘇杏璇做老媽子、老媽子咁，而唔係老母、老母。我諗今日如果TVB重拍《新紮師兄2019》會點呢？6.12播第一集，牛頭角順嫂睇睇下會唔會：『哎呀，點解變成咁樣，咁暴力嘅？畀返以前嘅張偉杰我啊！不如睇返《6點半新聞報道》算喇！』睇《6點半新聞報道》好多嘢睇唔到！原來唔使50年，30幾年就變晒。」
第一次完場時，林海峰笑指今晚笑得出，是因為姓林的：「今晚笑唔出，都係因為姓林嘅，一人做事一人當！」黃秋生與葛民輝在Encore時以嘉賓身份出場，除了唱歌外，當林海峰表示今晚人齊想要「搞啲嘢」時，黃秋生即說：「你搞時搞唔好搞爛啲玻璃，唔係好大劑！」
而到真正完場時，場內有一幅黑底白字，寫着林海峰新歌歌名《努力！奮鬥！加油！》的巨幕降下，而縱使林海峰已離台，但觀眾亦留在場內大叫「香港、加油」。
採訪、攝影：曹家誠、王連連
完場時，場內有寫着歌名《努力！奮鬥！加油！》的巨幕降下。