一聽「EightKwaiFong」呢個名，你以為係蘭桂坊啲Friend？錯晒，係就係「桂坊」，不過係跑馬地桂芳街8號嘅服務式住宅丫。

物業只係得開放式及一房間隔，其中開放式月租2.65萬元起，包咗部份家電、水電雜費啦。至於一房戶月租最平4萬元，建築面積500幾呎，二人世界啱啱夠住。

單位開放式廚房，麻雀雖小但五臟俱全，睡房有張巨型睡床、大碼觀景窗，畀你望勻山景，不過浴室就細咗啲，一睇用料就知行精品酒店路線啦。

項目最快8月入伙，除咗一般服務式住客設施，佢仲有唔少藝術品，畀你欣賞一吓。