當年今日
關於我們

全日鋼膽都「爆煲」
求驗客手記:車仔輸波冇路捉

蘋果日報 2003/10/03 00:00


過去兩個歐冠盃比賽日結果都幾極端,禮拜二正路戰果較多,到禮拜三就爆到七彩,開完一日熱就到一日冷,齋講前日買咗車路士加拉素過關雙膽嘅讀友肯定一殼眼淚。諗番首輪比賽都係咁兩日分別開兩瓣,之不過當時係先冷後熱啫。所以話有時攤路嘅嘢都咪唔信。即管睇吓呢個攤路會唔會延續到下一輪啦。
車仔輸波都咪話唔離譜,話晒土耳其球會實力已經唔及兩、三年前,上輪比錫達斯主場都輸得畀拉素,有邊個估到佢哋今次竟然能夠作客砌低富豪球隊?再講,最近歐洲強隊興開單跳,當大家睇住車仔上周六對維拉贏波輸盤,諗住前日對比錫達斯會贏番場大大鑊啦,點知又唔係。邪到咁,捧場客想唔輸至奇。

中國新仔有機成紅魔學徒
我求大俠噚日就講曲波靜靜雞去咗布力般跟操,其實亦有一個十八歲新秀叫董方卓上個月前已經跟曼聯青年軍練波,紅魔鬼對佢嘅表現幾滿意,重有意簽佢。由於勞工證問題,只能成為學徒球員,或者安排簽約旗下合作球會培訓,作長線投資。如果大連實德肯放人,絕對係好事。
流浪下仗鬥紅魔有睇頭
格拉斯哥流浪今屆喺歐冠嘅表現令人眼前一亮,如果前日唔係捉到鹿唔識脫角,臨完場俾彭拿典奈高斯追番,已經兩連勝。流浪下輪就會同曼聯進行英倫打吡,到時領隊麥利殊同費爵爺呢兩個蘇格蘭佬就大鬥法。曾效力曼聯嘅貝治亦會倒戈看管雲尼斯達羅,千絲萬縷,到時有睇頭。

伊利安扮聾變紅牌阿姑
比錫達斯球星伊利安係就係幾靚仔嘞,之但係前晚佢就認真瘀皮,連續兩次因為聽唔到球證吹停咗比賽,繼續踢走個波,結果「兩黃變一紅」。佢賽後就話聽唔清楚笛聲,但一次都可接受,兩次都係咁就有點兒那個。好彩隊波最後都贏,如果唔係想唔做罪人都唔得。

史特加門神好波又騎呢
史特加今季喺德甲未失一球,令到龍門希迪布蘭都備受注目,我求大俠前晚睇史特加對曼聯都特別留意佢。結果睇見着住短袖衫嘅佢左撲右撲,反應敏捷,但又表情奇奇怪怪,都幾得意。唔止咁,當隊友主射十二碼時佢好肉緊咁祈禱,睇佢形態,真係有潛質做新一代騎呢龍門。