韓國天團BIGBANG隊長G-DRAGON(GD)噚晚起一連兩日喺澳門威尼斯人金光綜藝館舉行個人世界巡迴演唱會「G-DRAGON 2017 WORLD TOUR ACT III, M.O.T.T.E」,有別於上周首爾場有「國民妹妹」IU及同門師妹CL助陣,今次澳門騷GD一人由《Heartbreaker》開場唱到安哥,當中仲甚少講嘢,一口氣演出多首歌曲,落力演出兩小時。
由於今次演唱會主題係「母胎」,所以色調以紅色為主,GD多數以全紅色打扮亮相,而演唱會途中於大螢幕播出嘅短片內容亦以醫院、紅色、白色居多。GD甫開場就一口氣連唱多首人氣歌曲,包括《Heartbreaker》、《But I Love You》、《One of A Kind》、《R.O.D》等。換上深紅色西裝後,GD再現身喺6呎高台獻唱《That XX》,當GD唱到與女歌手金倫我合作嘅歌曲《Missing You》時,粉絲就大合唱充當女聲部分。
及後《Who You?》時GD更解開衫鈕露肉,再次惹來粉絲尖叫,GD又大派飛吻冧粉絲,之後就播出GD家人、BIGBANG成員太陽、大成、「馬舞大叔」PSY等嘅短片,眾人大談舞台上嘅GD及私下嘅權志龍(GD本名),被問到「權志龍係個點嘅人?」時,GD父母對囝囝都有讚冇彈,不過家姐就大爆GD鍾意去派對、飲酒後會講嘢,認真搞鬼。
粉絲不時用韓文高呼GD本名,再次換上紅色大褸出現嘅GD升到半空獻唱《Superstar》,又連唱《Middle Fingers Up》及《Bullshit》兩首新歌,又唱又跳嘅GD唱到唞晒大氣,又配合《Bullshit》嘅韓文譯名《狗吠》扮狗叫,粉絲同樣受落,之後GD就以英文表示:「大家覺得啲歌點?今日係澳門站首場,好榮幸可以嚟到呢度開騷,今晚好amazing。」GD又指新碟《權志龍》表達嘅嘢好私人、好多佢內心嘅諗法,一度擔心粉絲會唔明,不過粉絲能夠理解令佢大感高興,GD又抹汗扮喊,但就強調自己冇喊,續指「過去一年有好多嘅困難,好多謝大家等我」。
安哥時GD清唱《This Love》出場,及後表演《Crooked》時喺舞台上四圍跑,最後更瞓落地下,似乎相當攰。GD喺粉絲嘅歡呼聲下企返起身並以「thank you」、「I Love You」感謝及示愛粉絲,介紹完樂隊及Dancers後GD拍大螢幕叫開門扮完騷,當然冇工作人員理佢,GD就扮無奈表示「惟有唱多首歌先走喇」,並唱出最後一曲《無題》,最後就90度鞠躬隨升降台離開舞台,為演唱會畫上句號。