深圳龍華鎮百億富豪兼「龍華」系馬掌舵人謝國輝，剛周二晚(7日)在沙田馬場會所設宴，與一眾宗親好友，分享他成為全球謝氏總會主席的喜悅，謝國輝同時亦係香港謝氏宗親會榮譽會長，他表示會努力為兩個團體作出貢獻，唔會辜負大家嘅期望。
今次晚宴獲邀出席的馬圈中人不多，沒有練馬師，騎師則只有華將楊明綸及其評馬人女友莎拉獲邀參加，令人有啲意外，因為過去「龍華」系馬好少用楊明綸，彼此冇合作贏過馬，但莎拉就因工作關係，好幾次追訪過謝國輝太太金沛橋及謝公子謝劍汶，成為好朋友，唔知係咪因為咁，間接令楊明綸亦都得到「龍華」系嘅支持，如果真嘅話，咁綸仔未來就有更多機會騎實力馬。
講開「龍華」系馬，周日(12日)將有隻呂廐馬「金國龍華」上陣，不過謝國輝好坦白，席間向一班宗親表示，與其留意賽績欠佳嘅「金國龍華」，倒不如吼實稍後安排出賽嘅「金珀龍華」及「金鎸龍華」。謝國輝指「金珀龍華」質高進度好，跑泥地和快活谷可看高一線，至於「金鎸龍華」已減分不少，最近試閘勝出，狀態大有起色，今季應可大力反彈喎！