大家成日話股市「五窮六絕」，今年五不窮，六絕唔絕就仲未知，不過恒指就向緊26,000點進發，有人日日對住股票機嗌「升呀升呀」，亦有人收割印印腳嘞。好似獨立保監局主席鄭慕智，佢最近就keep住沽貨，連日沽中移動（941），加埋粵海投資（270），套現約1,400萬元。
不過，鄭慕智唔算靚價沽貨。根據聯交所資料，佢上星期有3日，減持中移動合共10萬股，平均價介乎86至87元，中移動今年3月爆過上去90蚊樓上，舊年下半年有段時間甚至喺95蚊以上㖭。

另減持粵海投資　共套千四萬

鄭慕智喺高位唔沽，家陣80幾蚊沽，按普通股民思維，可能覺得差唔多，好難再爆上去，又驚大市位高勢危，沽少少賺甜頭都唔錯吖。佢沽中移動套現860萬元，仲揸住30萬股，市值2,600萬元，可以慢慢沽喇。
同時，佢上周二亦減持咗粵海投資，套現568萬元，加埋中移動，總共套現約1,400萬元。講開又講，大家之所以知道鄭慕智減持中移動同粵海投資，係因為佢擔任兩間公司獨立董事，增持或減持都要披露，照計佢唔會只投資呢兩隻股，好想知佢有冇沽埋其他股票囉。

李華華
mailto:[email protected]

97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk