鄭融日前與周柏豪拍攝合唱歌《一事無成》的MV，導演特別找了一隻小羊咩作為「臨時演員」，給二人扮牧羊。未開始拍攝時，小羊咩因為受驚過度而當場大小便。

阿融為了安撫羊咩，便不停拍着小羊的背部，她表示一早已見到小羊咩在顫抖，她說：「我見到隻羊係咁震，我覺得好慘呀，好想放佢走，不過導演話想個MV特別啲，叫我哋扮情侶放羊，我惟有拍吓佢，希望隻羊咩唔好咁驚啦。」
柏豪表示於MV中與師姐沒有親密鏡頭，他恐怕自己忍不住笑，他說：「我平時同阿融都係嘻嘻哈哈一齊玩，我驚要求我同佢深情對望，到時我實會忍唔住笑咗出嚟，好彩係放羊同踩單車啫。」

原來在阿融唱過合唱歌中，令她留下最深印象的是《無敵是愛》，因為她曾經和歌神許冠傑（Sam）合唱此歌，她說：「當時阿Sam開演唱會，大家好緊張每晚同佢合唱，我有份同歌神合唱真係好榮幸，所以我好鍾意《無敵是愛》呢首歌。」至於柏豪最欣賞許志安有份參與的合唱歌，他表示：「安仔把聲沙沙哋，佢都唱過好幾首合唱歌，當佢同葉德嫺合唱我覺得最正，因為兩個把聲都好有吸引力，我都好希望將來有機會同安仔合唱。」
採訪：李珮洳　攝影：葉君海
化妝：KrisWong、VinCTsang
髮型：JohnChung（Headquarters）、KateShek（HairCulture）