【新增內容】

岑麗香同泰臣今日到跑馬地馬場，出席馬會舉行嘅《好運1月1賽馬日》活動，被稱為「好運之星」嘅佢哋，仲即場同兩位騎師梁家俊及潘明輝玩遊戲。香香與梁家俊一隊，而泰臣就同見習生潘明輝一隊，練馬師羅富全做嘉賓評判，其間泰臣在前邊行邊Call馬，而內檔香香一隊雖在最後甩腳踏，但仍勝出尾關比賽。

問到兩人平時有冇試過投注賽馬？香香表示：「自己好少買，但鍾意睇，因為之前拍劇試過要騎馬，但係就唔叻，馬匹控制得唔好，睇賽馬就好開心，因為見到騎師控制得咁好，好精彩。」 至於泰臣就話曾經試過一班朋友夾份贏過位置Q，佢話：「唔係贏好多錢，幾個朋友夾埋有五位數，夠我哋食一餐好豐富兼有鮑魚嘅晚餐，講就咁講不過我之前都交過唔少學費。」

講到幸運之星，咁香香覺得自己係唔係？同時有冇將幸運帶俾身邊人？佢話：「我覺得好幸福好Lucky，做到自己鍾意做嘅嘢，又有個好老公。」咁希唔希望生個小朋友延續福氣？但佢話唔一定有小朋友先可以延續福氣嘅。嚟緊聖誕，香香話要睇下工作時間安排，希望可以同老公一齊過。

更多娛聞，喺晒《娛果》
http://fb.com/appledailyent