「愛彼女皇盃」今日喺沙田馬場舉行，本身為呢項賽事大使、今日應邀主持開幕禮嘅李嘉欣，就因為發高燒而臨時未能出席，公關就話李嘉欣幾日前由澳門返港就開始發燒，仲試過燒到40.3度添，打咗兩支針都未好，到今朝仲燒緊，故未能出席，好彩囝囝同老公就冇事，希望佢快啲好返啦！而李嘉欣同家人名下嘅「一寶」，就會跑第7場，最後嬴咗第一名！

及後公關亦發聲明，表示醫生曾為李嘉欣注射antibiotics也未能好轉，嘉欣表示幸好小朋友和丈夫都沒被傳染，因該病菌不會攻擊小朋友，而丈夫身體則比較強壯。而許晉亨就話原本唔想嚟，寧願留在家中照顧嘉欣，但嘉欣堅持要老公一定要出席支持，而最後「一寶」亦從後而上，力壓「天久」贏得第七場冠軍。

此外，今日應邀到馬場嘅嘉賓分別有蔡加讚、鄧鉅明夫婦、邱子傑、張洺華、莊思敏同埋李桂蘭等等。

懷孕4個幾月嘅呂慧儀同老公黃文迪都有入場睇馬，，而官非纏身嘅羅傑承亦都有入場，雖然俾唔少記者追住嚟影，但仍表現輕鬆。

今日郭富城愛駒「愛的呼喚」喺稍後第5場賽事都會落場，不過城城因為拍攝緊電影《道士下山》，故未能到場支持。