2014年，107歲的邵逸夫仙遊，鄒文懷出席追思會，傳媒都關心兩位勁敵是否「一拜泯恩仇」。同年鄒文懷接受《蘋果》專訪時說：「其實冇乜嘢怨，我哋兩個好夾，都合作得好好。佢確對我有恩，但我亦已為他服務多年彌補許多。」

鄒文懷畢業後本來任職記者，做西報記者時，因為英文太好，後來美國新聞處的上司介紹他到邵氏做電影宣傳，與六叔用上海話溝通。鄒文懷曾憶述，第一天上班，有部戲剛拍好，邵逸夫在辦公室試映，導演叫來一班明星。鄒文懷看完，覺得唔掂，但其他人大力拍手。六叔問他：「好不好？」鄒直說﹕「不好，一無是處。」

鄒文懷曾覺得自己不適合邵氏，想返去美國新聞處，六叔留他﹕「我喺新加坡好舒服，點解要嚟香港？因為香港電影拍得唔好，我收番嚟自己做，你要留低幫我。」於是鄒文懷就由宣傳做起，升至製片主任、製片部經理。

鄒文懷在訪問中說，六叔非常精明，也是工作狂，而他本人卻是周身癮，最愛玩。鄒文懷最難忘六叔經常帶他到上海浴池洗身傾偈，又教他要在床邊放一支筆一本簿，可即時記下做夢好橋。「他還叮囑我要放鉛筆，怕墨水筆會冇墨。」六叔的寫字枱很整齊，鄒文懷卻凌亂不堪，六叔罵他：「你再唔執拾，我入到嚟睇唔到你。」鄒文懷就話：「你俾咁多嘢我做，點可以清？你張枱乾淨，因為你全部俾晒人做。」

1970年，鄒文懷離開效力了十一年的邵氏，與何冠昌、梁風等自立門戶創立嘉禾，三張皇牌：李小龍、許冠文、成龍，短時間內動搖了邵氏老大地位。嘉禾英文名字'Golden Harvest'，是1954年首辦的東南亞電影節「最高榮譽」的名稱，鄒文懷的野心已十分明顯。

當年不少人指摘鄒文懷反骨。事隔多年，鄒文懷說：「離開當然有令我不快嘅原因，當年的確比較轟動，但唔係好多人話我反骨。每個人都知六叔（邵逸夫）厲害、要求好高，久合必分也是常態。當然，我同佢打對台，佢一定唔開心。」