現年37歲嘅韓國女歌手Horan，近期是非多多，7月時遞交文件，向法院申請跟結婚3年嘅圈外人老公離婚，今早佢就因涉嫌酒駕而要接受警方調查。

Horan所屬事務所今日發表道歉聲明，指：「Horan今早韓國時間6時，前往出席電台節目途中，於聖水大橋南段發生車禍，Horan因涉嫌醉酒駕駛而要接受調查。今次嘅事件冇解釋嘅餘地或藉口，Horan將會深切反省，暫時停止所有演藝活動。」

警方下午表示：「血液嘅酒精濃度有0.101%，係達到要吊銷駕照嘅程度，而後面架車嘅司機就受傷送院。」

Horan所屬嘅組合酷懶之味（Clazziquai）上周二先推出新專輯，回歸未夠十日就爆出是非，令歌迷非常失望。