獨眼龍喺電影《賭俠》中，有睇穿對手啤牌嘅特異功能，估唔到而家喺香港做區議員，亦要有大大聲讀牌嘅奇技，先可以為街坊踢走非法賭檔。話說東涌富東邨同逸東邨，都有唔少非法聚賭嘅黑點，當區現任民主派區議員王進洋最近見到疫情緩和後，呢啲非法賭檔又死灰復燃，而佢搵極政府跟進，部門都只係識互相推搪唔做嘢，所以佢就諗到奇招處理，就係大大聲讀晒非法聚賭人士啲牌出嚟！

阿洋接受八方查詢時話，過去試過好有禮貌咁勸街坊唔好非法聚賭，可惜對方只當耳邊風，更叫佢「唔好咁多事」。鑑於之前試過有人因非法聚賭打大交，搞到防暴警要到場處理，阿洋自己亦接過非法聚賭人士家人投訴，話呢啲非法聚賭錢銀上落極大，試過一鋪萬幾兩萬元上落，亦曾因此引發家暴，希望佢能夠諗辦法制止，所以佢今日不惜以身犯險，現身非法賭檔現場，再「大大聲朗讀他們手上的牌，整停賭檔」。

阿洋話，今日大聲讀牌時，非法聚賭人士一度想衝過嚟打佢，話佢做咗區議員就「一朝得志，語無倫次」，又叫佢要「睇X住嚟！」，但佢堅持繼續讀牌，最終讀咗分零兩分鐘，非法聚賭人士就無癮離開，佢亦算係暫時處理咗今次屋邨非法聚賭問題。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！