國足正進行世界盃外圍賽最後兩場生死戰，又碰正全運會，難免出現爭人情況，今季轉投德甲雲達不來梅嘅前鋒張玉寧，就係最新例子。原定因為雲達距離上仗外圍賽四日前先放人，所以國足教練納比決定唔召張玉寧返嚟踢外圍賽，但出戰全運會嘅浙江U20，竟然成功執死雞，召到張玉寧返嚟打準決賽。

全運會男足由U20球員角逐，生於浙江溫州嘅20歲前鋒張玉寧，合資格出戰，浙江更加會喺周二同湖北爭決賽席位，據報張玉寧周日已經由德國飛抵北京，亦轉車到天津，同浙江大軍會合。不過其實周二晚，國足就會作客卡塔爾，踢12強賽最後一輪比賽，國足唔贏就肯定無緣俄羅斯世界盃，有國家隊生死戰唔踢，反而踢全運會，張玉寧之後唔知會唔會被國家隊秋後算帳。