日本女星松嶋菜菜子雖然拍過高收視劇《傭人三田》，不過因為俾人話佢難服侍，各電視台都怕咗佢，所以幾年嚟都冇新劇拍。好彩菜菜子終於發市，佢將擔正主演TBS電視台紀念終戰70周年嘅兩集特備劇，扮演軍隊入面嘅護士。

呢套劇未有劇名就已經被指收視必高，因為有菜菜子之外，仲由《半澤直樹》幕後班底炮製，所以話係最強組合。劇集日前喺靜岡縣開鏡，菜菜子稍後要到北京、瀋陽等地取景，仲要喺內地留足一個月。

不過，劇中可能涉及敏感題材，因為會提到菜菜子見到日本軍喺東北地區嘅行為而心生矛盾，有機會觸動到中日兩地觀眾神經。而且日本一份體育報章嘅網上娛樂新聞將菜菜子嘅「從軍看護婦」寫錯「從軍慰安婦」，雖然已立即更正，但已經被日本網民鬧爆！