四太梁安琪一家去曼谷過復活節假期，細仔何猷君帶埋超模女友奚夢瑤同行(新聞連結： https://bit.ly/2GwPhar )，融入何家，《蘋果》今日致電四太，佢表示此行好玩，佢話：「都係行吓街、食吓嘢，不過都係玩咗兩、三日，今日都要返工。」

講到對奚夢瑤嘅印象，四太有讚冇彈：「佢係好女仔，好有上進心，做嘢頭頭是道，好細心。佢好忙，佢同猷君喺第二度飛嚟，呢個女仔真係幾好。」問到係唔係覺得猷君揀得好？四太笑言：「佢好眼光，但要睇番有冇福氣，佢哋係唔係拍拖就問番我個仔。」

而據讀者喺曼谷現場所見，奚夢瑤確實好識做，對四太特別殷勤，四太喺cafe坐低，只有佢跟埋入去，仲幫四太拉凳，咁細心，難怪咁得長輩歡心。

精選娛聞，喺晒《娛果》
http://fb.com/appledailyent