估唔到一個區議會選舉，都會製造另類就業機會。八方喺勞工處請人網頁中發現有份工請「屋邨聯絡員」，原來係早前報稱「公民黨之友」嘅梨木樹嘅參選人周慧兒大開水喉請人搞選舉。
呢份工時薪40蚊，職責講明係「區議會選舉助選」，派傳單兼上樓宣傳，最好要識潮州、福建話等方言，員工福利包括膳食，間中有茶水供應，算係筍工一份。有梨木樹街坊同八方講，周慧兒同親中團體熟絡，今次參選當然係要走公民黨嘅選票。周慧兒承認請人但唔認票。呢份工比最低工資多12蚊，若閣下想體驗政治鬥爭，都可以試吓應徵。呢區候選人仲包括公民黨陳琬琛同民建聯呂迪明。