韓國女團少女時代（少時）成員Tiffany近日以個人專輯回歸樂壇，除咗上音樂節目打歌之外，Tiffany仲以嘉賓身份，出演韓國搞笑19禁綜藝節目《SNLKorea》做宣傳，節目將於今晚播出，而製作組今日就公開咗啲花絮相畀粉絲先睹為快。

節目之前已經推出過《3分鐘男朋友》、《3分鐘妹妹》等單元，而今次Tiffany就出演《3分鐘女朋友》單元，Tiffany將變身成為演員權赫秀嘅「3分鐘女朋友」。據知今次Tiffany要變身做唔同風格嘅「女朋友」，有性感、可愛、可憐等等，都真係幾考演技。而製作組今日公開嘅相中，只見Tiffany好似樹熊咁攬到權赫秀實一實，真係羨慕死粉絲。而另一張Tiffany就着住低胸衫、熱褲喺度洗車，再加上挑逗嘅表情，相當性感！

今次Tiffany仲係少時當中第一人出演《SNLKorea》，平時都有成員喺身邊，今次得自己一個難免有啲緊張，而且睇返佢同節目組第一次排練嘅片段，佢相當專心寫筆記，似乎好驚會出錯。