人生七十古來稀，活到這把年紀，應該嚐過甜酸苦辣。

劉定成這個名字或許陌生，但從網絡搜尋，他的新聞就排山倒海彈出來。人人叫他「劉公子」，他的家族做地產生意，外祖父是廣東賭王霍芝庭，劉含着金鎖匙出世，自幼被富養，大學畢業已承繼亡父大筆遺產，胞姊又是澳門賭王傅老榕的媳婦。有錢就是任性，同性戀的劉公子早年沉迷為同性拍照，2012年因非禮及刑事恐嚇罪成入獄，判囚17個月，同時爆出他2003年曾用試鏡及拍照做藉口，相約多名男藝人及模特兒到酒店或其跑馬地豪宅內拍性感肉照，警方調查期間竟搜出逾6萬張猛男照片，還有49條T-back呈堂，控方證人名單上還有羅仲謙等人。

富商身陷囹圄，飽受牢獄之苦，劉公子人生跌入谷底，2014年3月殘爆出獄，決心重整人生。同年9月爆出雨傘革命，他低調到金鐘支持，及至去年6月的逆權運動，劉公子積極參與，他自去年6月9日上街後，過去逾8個月無間斷撐反送中。劉公子在訪問前都堅持要叫口號「五大訴求，缺一不可」，「係呀，我唔係單單黃色，我係深黃，lemon yellow檸檬黃呀！我住跑馬地當然係藍喇，鄰居都係藍，黃嘅朋友佔百分之九十九。」劉公子稱朋友間未有因政見不同撕裂：「我唔會同藍絲朋友『割席』，彼此尊重、包容、欣賞，大家政見唔同都唔使吵鬧，同唔做朋友。見到藍絲大家心裏有數，避免衝突，但同黃絲傾偈就梗係手舞足蹈，過去8個月同一班手足好多話題，我都加入咗佢哋啲群組，大家發放訊息。」

擁有經濟能力的劉公子平日有低調幫手足，「好多街頭捐獻幫學生，唔使出名。」政府日前宣佈給18歲或以上巿民1萬元，劉公子呼籲：「我唔係叫大家嘔番出嚟，而家冇咗星火，希望大家拎去捐畀前線學生、支持被秋後算賬醫護同民主運動，過去遊行有100萬、200萬巿民行出嚟，計起條數嗰度有100億，我會帶起頭捐呢筆錢，義不容辭。」

劉公子年輕時一直打理家族地產生意，60歲時退下火線，62歲卻入獄，囚禁17個月，人生逆轉，他形容人生是「由天堂跌咗落地獄，地獄之下仲有深淵」，2014年3月出冊，他參加雨傘運動，開始關注民主運動，去年積極支持反送中，過去8個多月無間斷參加相關遊行和集會，「呢8個月，我學到好多嘢，我前半生渾渾噩噩，過去60幾年乏善足陳，而家先開竅，我都希望有機會升番上天堂，我決定『今天的我，打倒昨天的我』。我今年已經70歲，我唔要咁長命，要活得精采，活得有良知。」劉公子表示有生之年仍會力撐民主運動。

劉公子用兩首英文歌《You'll Never Walk Alone》和《Walk Hand in Hand》寄語手足要撐下去，他說：「呢兩首歌嘅歌詞令我日子容易過，鼓勵我唔會畏縮，你越打壓我，我越挺起胸膛。」劉公子唯一不變是仍然愛「集郵」，入冊前，他愛拍攝爆肌猛男，出冊後，他目標轉移，「以前我鍾意靚仔，但同佢哋影相都係過去式，而家心目中我會想同一啲政治明星合照，唔係TVB（藝人）。你哋黎智英先生，我當佢係英雄。我仰慕王喜敢作敢為，我唔認識佢，其實逢係肯發聲，有良知嘅藝人我都欣賞，王宗堯、黃耀明同何韻詩等都係我心目中偶像英雄，我亦好欣賞同聲同氣嘅一班議員，有許智峯、譚文豪、陳淑莊等，而家我會揸相機去民主運動，實況實境記錄真人真事，我去完乜嘢疲勞都冇晒。」劉公子熱捧黃色藝人及議員，可會不屑撐警藝人如譚詠麟、曾志偉等？他答：「我都包容，體諒人各有志啦！」

以劉公子的身家，他晚年絕對可以享受人生，但他選擇繼續上街，「唔好講呢啲，而家大家要關心點樣先完結呢場肺炎災難，跟住我哋嘅民主運動點樣繼續行落去，警方成日係咁打壓，拉呢個，拉嗰個，止暴未來條路仲好遙遠。」

撰文：陳杰
攝影：郭賢興
攝錄：廖達燊、馮嘉銘
場地：火鍋頭

-----------------------------
第三屆最港電影大獎
按此立即投票

-----------------------------
【武漢肺炎】專頁
全民自救 抗疫資訊盡在《蘋果》