周日IAAF鑽石田徑聯賽斯德哥爾摩站，加拿大飛人迪加斯喺男子100米決賽中跑出9秒69嘅佳績，可惜當時風速高達每秒4.8米，比規定嘅每秒2米超出一倍，所以呢個成績唔會刷新2017年男子百米跑嘅紀錄。

迪加斯賽後話：「我見到個成績都嚇親，因為我嘅目標只係喺10秒內完成比賽。今次嘅成績令我信心大增，希望我可以保持狀態，喺世錦賽都造出好成績。」

值得留意嘅係，男子100米世績係保特喺2009年跑出嘅9秒58，而「閃電」喺里約奧運就跑出9秒81，當時比迪加斯快0.1秒；兩位飛人將於八月舉行嘅倫敦世錦賽再次碰頭，相信迪加斯都想把握機會，喺保特生涯最後一戰報仇。