當年今日
關於我們

佘詩曼麥芽糖戀情扯唔斷

蘋果日報 2006/02/26 00:00


○二年六月,佘詩曼和陳浩民開始傳緋聞,至今傳足三年零八個月。對於現在關係,阿佘妙喻為「食又食唔晒、拉極又拉唔斷」的麥芽糖,認真甜到漏!雖然男的花弗新聞成籮,但阿佘仍智珠在握地自詡浪漫型最佳女朋友,滋油淡定表態唔憂嫁。
愛情篇 一笑鍾情
近幾年,拍劇佔去佘詩曼的九成時間,餘下便是睡覺和私人活動,而愛情生活,在過去三年零八個月中,雖然偶有馬德鐘、丁子高和張智霖等緋聞穿插,但傳得最久兼最有嫌疑的一位,說到底是陳浩民。日前阿佘在將軍澳接受訪問,談到如果愛的話題時,原來她所要的愛情實在太簡單了:「最緊要望到佢就開心,兩個人一齊唔需要掩飾,咁就係最好嘅愛情。」
仍處於觀察期
阿佘坦言現在確有令她一望就覺得快樂的人,可惜自己能望的時間太少,至於那個人是否陳浩民,她只笑咪咪說:「望到開心嘅人有好多,係咪真係可以發展落去,真係需要時間,需要溝通、了解,有過程㗎嘛。唔係十八、九歲,冇責任,一見鍾情,鍾意就拍拖,唔鍾意就分手,𠵱家做乜嘢都好似要同人交代,我唔係呢啲人嚟㗎,我一個人讀書、一個人生活咁耐,從來都冇需要交代嘅,要同全世界交代自己嘅一件事咁煩,睇定啲先喇。」
阿佘和陳浩民的緋聞始於○二年六月拍攝電影《情緣汽水機》,翌年說過跟陳浩民處於觀察期,這樣又三年了,問她觀察結果如何?她說:「佢又唔係成日喺香港,點睇啫?連見面機會都少,睇天時地利人和啦。」
「我係個好女友」
要阿佘形容與陳浩民之間的關係,她竟然妙喻說:「好似麥芽糖咁,食極食唔完,拉極又拉唔斷,我意思話佢成為我嘅緋聞男友好耐啫。」至於會不會跟麥芽糖一樣甜到漏,她哈哈笑說:「唔話畀大家聽,食晒成樽嘢甜死啦,要好長時間至有發展空間嘅。」
陳浩民花弗新聞甚多,但阿佘仍處處維護他,她說:「其實我真係唔知,都唔睇娛樂新聞,佢做嘅嘢我控制唔到,大家都喺娛樂圈,都知道傳媒嘅宣傳手法。信唔信唔係最重要,因為唔係呢個階段去諗嘅事,開始至講啦。」
如今女星愈來愈遲婚,三十歲的阿佘還不考慮生兒育女,問她不擔心嫁不出嗎?她即說:「唔驚,未到咁可憐,我係一個好女朋友嚟㗎,但我係一個好冇時間嘅女朋友,我同以前嘅男朋友都係好朋友,如果係咁衰嘅人,冇得keepcontact啦,同埋我會花心思𠱁一個人開心,我係浪漫型喎。」
無暇約追求者
其實阿佘身邊不乏條件不錯的追求者,奈何一律食檸檬,或是未曾深愛已無情。「好難行第一步呀,圈外人唔明呢行嘅人冇時間,約你十次十次都話唔得閒,係咪玩呀?你都係唔鍾意我,邊可能晚晚唔得閒?所以慢慢就淡忘,都冇辦法,亂咁開始咪仲唔好。」
empty
empty
我係浪漫型女友!
empty
「一見你就笑」,原來就是阿佘尋覓真命天子的首要條件。
empty
陳浩民(左)和佘詩曼拍《情緣汽水機》而傳出戀聞。劇照
empty
佘詩曼、翁嘉穗、李明慧。資料圖片