話說費清同事係龍友中嘅龍友，閒來冇事都會周圍影相，不時都會發現一啲「秘景」，噚日就影到可能係全港島唯一嘅櫻花。
佢話喺香港賞櫻，原來可以唔使去嘉道理農場、大帽山郊野公園，因為鰂魚涌公園（近寵物公園嗰邊）原來都有一棵櫻花（圖）。櫻花品種相信係河津櫻，同中大新亞書院所種嘅一樣。櫻花正盛開，約開咗八、九成，但花朵數量不多，估計約一百朵。

#觀賞者態度最重要

佢立即報道同大家分享，點知都俾一啲網友插到飛起。「傳媒唔好報道啦，每次一定吸引晒啲人去，搞到啲櫻花渣都冇呀」。有網友話傳媒報道，係櫻花、楓葉等美景嘅死亡之吻。
獨樂樂，與人樂樂，孰樂？費清同事問費清應該點好。費清才疏，唔識答。只不過諗起櫻花之國日本，每逢櫻花盛放，地鐵、火車站都有好多雜誌、宣傳單張推介櫻花情報，例如邊度櫻花開得最靚，尤其特別講隱世賞櫻秘點。費清都會按圖索驥，好多時去到都會欣賞到令人難忘嘅漫天櫻花，未試過見到櫻花因為遊人如鯽而遭破壞、凋零滿地。
美麗無罪，聽講色彩斑斕嘅蝴蝶係色盲嘅。賞花，除了花，觀賞者嘅心情、態度其實更重要。

費清　 ＃要生計，也要生活 ＃毋忘初衷