當年今日
關於我們

【名家搶先睇】特朗普獅子偷桃(Mr. Tregunter)

蘋果日報 2018/09/24 14:53

Mr.Tregunter特朗普

經濟學係一門預測人類行為嘅學問,然後根據預測,有效分配資源。但經濟學有個前設錯誤,或說不準確,就係人會理性決定。現實中人卻唔一定理性。於是,在這不平靜時期,所有看似正路嘅判斷都顯得錯誤。橫空出世的人物都唔正路,希特拉正唔正路?毛澤東正唔正路?如果佢哋正路,佢哋就只係一個路人。特朗普被批評為唔正路,那就要衡量其唔正路的程度有幾大。
同樣預測人嘅行為,政治係另一個層次。政治要估算人心,再掌握人心,而這種估算並無任何model可以計算或參考。政治家係天生的,典型例子如劉邦。韓信打下齊國後,派人向劉邦報告自封為假齊王。劉邦聽完火都嚟,一手拍檯要發爛渣,張良檯下踩佢一腳劉邦立即醒水,就在那一秒內變臉順勢改口:「男人大丈夫,要做就做真齊王,做乜假齊王?封韓信為真齊王!」經濟學位可以讀返嚟,呢種政治意識冇得學。
平靜時期對正路嘅人有利,大家跟規矩安份守己,發揮專業技術,各得其所。不平靜時期有人破壞規矩,太正路者就會跳線元神出竅。一場颱風過後,判斷是否要先清理道路再開工,卻得出冇呢個機制、冇法律基礎這種結論。就好似拎住本相千里馬秘笈,然後搵到隻青蛙;又或者去買鞋,唔記得拎度好的腳尺寸而買唔成。當風浪越來越大,大鱷見到你咁樣,唔郁你郁邊個。
貿易戰現階段中美雙方都想以和談為結局,但共產黨由起家時已看透敢戰先敢和。現時各方面美國處於上風,中國和談,價一定唔靚。要和談就要先打到對方都有壓力,比如若共和黨中期選舉不利、時間拖長美國經濟開始受影響等等,咁樣再傾先有靚價。中國在賭一樣嘢:民主國家經濟衰退,選民會趕總統下台;專制國家經濟衰退,早期可以先夾硬嚟壓住。拖,也是迎戰一種。
另一邊廂,美國亦在賭中國頂得住冇。據日本共同社調查,目前有60%日本企業已撤離或準備撤離中國,剩下40%則正在部署如何撤資。中國雖然表面上有31000億美元外滙儲備,但外資走就要退番外滙畀人。今個星期四聯儲局如無意外會再加息,10月縮表又加到每月500億美元。一旦中國外滙儲備大幅收縮,要再牙斬斬就難。雙方都在等對方弱勢然後拎個靚價,都在伺機向對方使出獅子偷桃。然而近日美國直接制裁解放軍,就是特朗普在宣示,我招獅子偷桃比較勁。
Mr. Tregunter