不足2年內已有8人潛水或浮潛時喪命， 本港 的潛水愛好者亦難禁憂慮。潛水教練黃先生坦言，他自己在菲律賓潛水時險被船撞上，該水域為旅客浮潛觀賞鯨鯊的熱點，小艇會於海上找出鯨鯊再駛至該處讓旅客落水觀賞，黃先生當時在同一地方自由潛水，「我free dive完，咁啱我一擰轉頭已經有隻快艇駛到好近我，我就直頭係要推開隻船，個距離係近到我哋可以推開佢！」幸好能及時將船推走，才沒有受傷，否則隨時發生悲劇。對於本港屢有潛水人士被撞斃或撞傷，黃先生指：「老實講其實未必完全關揸船人嘅事嘅，因當初冇一個standard嘅做法，冇乜話規範要有點樣嘅做法去避免呢啲咁嘅意外。」他認為只能靠潛水人士及船家雙方自律保安全，但坦言若立法監管會更好：「如果有得立法，規定潛水嘅地方幾多米範圍內唔可以有快艇，又或者就算要駛近速度都要好慢，咁會好啲。」

「擔心其實都擔心唔嚟，但最緊要自己有做足安全措施。」有8年潛水經驗，現職潛水教練的Sunny認為，只要教練有做足夠的安全措施，其實不用太擔心，「盡量唔好太靠近啲航道，我會盡量帶開啲，唔好太靠近呢啲地方上水」，自己在教授學員時亦會多加留意水面上的動靜。

任職護士的Wilson是潛水初學者，但他原來一直未有留意本港已發生多宗潛水人士被船撞傷甚至死亡的意外，他知道事件後直言「可能啱啱學潛水都未算太驚，但知道後自己警覺性會高返少少」。他又認為海員考船牌時不用學習充氣象拔的意思「係一個缺陷（不足）」，所有水上活動，不單止潛水，浮潛、滑浪風帆等活動也應對這類浮標有一定的認知，若海員未必了解潛水知識，「惟有自己嗰邊做足啲」。