崔碧珈、林芊妤（Coffee）、夏尉喻（Barbie）最近合作為ViuTV拍攝一個全新整蠱節目《胸x計》，講到明係胸x計，即係要佢哋度吓計仔去整蠱人，睇吓佢哋係咪波大冇腦，抑或係身材與智慧並重！

日前佢哋喺銅鑼灣接受訪問，雖然今次係以身材做話題，不過佢哋覺得反而係考驗佢哋嘅演技、急才同合拍性，仲搵咗整蠱專家Kevin Boy做軍師，陳柏宇、游學修及李靖筠等分別獲邀請節目。Coffee話每一次拍攝前，大家會坐低傾一傾內容，但係佢哋太多嘢講，搞到成日俾人白眼，崔碧珈仲話：「我哋諗咗好多橋同計出嚟，不過KB成日都會話唔得，我哋就要再不停掟橋，由於太多聲音，每次開會都開好耐。」

佢哋三個仲話次次開工都好好迷失，唔知道究竟係佢哋整蠱人定係俾人整蠱，好似第一集嘅整蠱係陳柏宇，崔碧珈：「過程中要扮受傷害呃同情心，但係喺途中我已經喊到失魂！」Barbie亦話每次拍攝都有啲預料之外嘅事情發生，所以極佢哋需要有默契，慢慢仲可以有默契咁互補。

經過總結，佢哋覺得智商高低同男女、樣貌身材冇關係，不過明顯男性同情心較強易中計，唔知最後可唔可以平反波大冇腦？佢哋好有自信話：「咁要睇節目先知。」點知轉個頭問佢哋喺現實生活中俾人整蠱嘅經歷，Coffee話讀書嗰陣試過有一個身型瘦削但係肚凸凸，同佢講話有咗BB，但係Coffee話之後佢仲繼續打籃球，到幾個月先承認係講笑！喺側邊嘅崔碧嘉突然問：「你個同學係男定女？」不過好快知道自己問咗啲傻問題！

場地提供：權八居酒屋