（還未成為神的）子華曾說：「做人，從來都唔容易。」

原來，買飛都唔容易。

1994年，仲未學「中國古拳法」的外賣仔何金銀，為了買學友演唱會飛，以便約埋環球精英體育中心的阿麗一齊去睇，白白犧牲了自己每星期的唯一一日假期，排通宵，結果畀佢成功排到頭位。

就在門票開售前一刻，先有一條西裝友獻出1000蚊（後來加到2000蚊），後有一名妙齡女子獻出胸部——這一男一女所獻出的儘管不同，但同樣想用少少甜頭，換走何金銀千辛萬苦得來的頭位。

何金銀斷然拒絕，並說：買飛應該憑自己努力。

Yes，我們經歷過一個必須人肉排隊買飛的年代，成個過程，全憑何金銀所指的努力。但努力，真的可以幫你買到飛？

如果你有睇《破壞之王》，應該記得就在準備開售時，殺出一個狀甚可憐的阿婆，話想幫個孫買飛；何金銀不虞有詐，立即讓出自己排足成晚通宵的頭位，結果——所有門券被該名阿婆掃晒，並連隨交畀身處場外的乖孫，正價飛頓變黃牛飛……何金銀崩潰了。

事隔廿年後，香港好似進步了，我們可以在網上優先訂飛了，點知依然不保證買到（嚴格來說是不保證load到個網頁）。以前是把毅力放在成個body上（排通宵），現在則集中在一隻手指上（撳F5）。方式不同，但結果一樣，我們還是可憐的何金銀，依然為了買（唔到）飛而煩惱，為了黃牛而無奈及發火。

明明好想睇的人注定買唔到飛，從來冇諗過睇的人就注定買晒啲飛。

因為，在香港，努力不保證修成正果，奸詐卻能搶奪別人成果兼且不怕帶來任何惡果。你話離譜？Well，且讓我引用黃子華「係啦定律」解釋：係咁㗎啦～好出奇呀？

專欄作者簡介：
月巴氏
敬愛林振強。看了過百次《東邪西毒》和《一蚊雞保鑣》。沙田友。

Facebook專頁：
https://www.facebook.com/fatmoonba/