「宇宙巨G.E.M.」鄧紫棋一連五場《G.E.M.X.X.X.LIVE世界巡迴演唱會-香港站》噚晚就喺紅館結束，連日來鮮見有歌手朋友棒場，只係有小鳳姐同王君馨等有去睇，G.E.M.兩位好姊妹何超蓮同李蘊噚晚就再去撐場，令G.E.M.喜上眉梢，凌晨五點仲未瞓，喺微博放上後台合照。尾場G.E.M.表現得十分不捨，識做地感激一班「米飯班主」話﹕「多謝你哋(粉絲)，我嘅快樂係由你哋帶畀我。」

G.E.M.自從喺強國竄紅之後，被指態度變囂及要求有巨星級待遇，首場演唱會疑怕「蝕底」唔想幫杜莎夫人蠟像館免費做宣傳，拒絕企喺自己蠟像前做訪問。噚晚又發生類似事件，呢排好興喺演唱會發生嘅事「求婚」，演唱會中段時，G.E.M.企喺鋼琴旁問在場觀眾趕唔趕住走先，跟住佢就話想做一件人生第一次做嘅事，佢高呼「好緊張」後就介紹坐喺控制台嘅演唱會執行導演Calvin，佢話:「今日係Calvin同Candy好重要嘅日子，交畀Calvin。」

拎住玫瑰花嘅Calvin就慢慢行去觀眾席，向女友Candy下跪求婚，Candy亦喺全場大叫「嫁畀佢」歡呼下講出「我願意」，被感動到喊晒嘅G.E.M.多謝Candy過去四年都等不停陪佢巡迴嘅Calvin返港，祝福兩人幸福快樂之餘，G.E.M.又哭成淚人，直言好羨慕話﹕「希望將來我嘅男朋友求婚，起碼都要咁樣先得。」

未知係咪同頭場電子傳媒訪問時情況一樣，G.E.M.經理人不滿媒體只影蠟像唔影G.E.M.獎座櫃而要轉移訪問位置，並指唔想幫杜莎夫人蠟像館做宣傳，所以今次求婚環節，工作人員拉起黑布遮住一對新人身後嘅大會指定信用卡-東亞銀行廣告牌。