昨日兩幅官地拍賣嘅成績符合市場預期，但係恒指都要跌60點收市，原因好簡單，成績好已經預期咗，而市場冇乜方向感，又係期指結算前夕，淡友形勢上有啲優勢，恒指跌幾十點都好正常。
大隻股份冇得炒，股民繼續炒細股，如果夠勇，跌市都有好多股票揀，不過，啲股動輒兩三成上落，入市策略都係二揀一，一係小注博大，可以貪心啲，一係見好即收，前一個策略止蝕位訂得低啲，有錢賺就逐步推高止賺位，後一個策略止蝕位唔可以太低，如果唔係值博率就唔夠。
今日期指結算，大股會郁番多啲，但係短炒都會係細股，細股有兩種，一種係股價細，另一種係市值細，呢兩種股票都會繼續炒。

中煤C輪7802：中煤（1898）昨日走勢好省鏡，配合利好消息炒作，升咗4.8巴仙收市，報9.45元，睇走勢同成交，應該未升夠，起碼要試吓10元，破位睇10.60元，可以買啲中煤C輪7802，隻輪昨日收1.15元，有效槓桿率5.5倍，正股升上10元同10.60元，7802應該喺1.54元同2元樓上，正股跌穿9元止蝕。