買樓買車係唔少人嘅願望,興勝創建上水低密度住宅高爾夫景園,鄰近翠綠嘅高爾夫球場,以追求悠閒生活嘅買家做銷售對象。
佢哋今個禮拜日首次喺現場舉辦睇樓兼試車活動,到時,現場會放置幾部全新型號日產名車,做車展之餘,睇樓人士重可以親身試揸,同時可以實地參觀示範單位,兩者兼得。
為咗將活動搞得有聲有色,重搵嚟男藝人譚耀文、女星吳文忻等助陣。
興勝項目董事周嘉峰話,個樓盤不經不覺賣出三十二伙,分層呎價三千五百,頂層空中王國,就要四千七。
配合加推第三座四伙,特設一百五十至一百八十日特長成交期。第二座重有八伙封緊盤,準備留畀投資者出價。
另外,中原地產會送出汽車美容及油券優惠,名額五個,總值十四萬。
超巨南區洋房標售
未來一個月,差唔多日日都有豪宅截標,旺到咁,都算近年罕見,個盤少啲特色,都幾難突圍而出。
啱啱加入招標行列嘅壽山村道23A號獨立屋,就以面積稱霸。
大屋由永傑集團陳澤儒個女私人持有,佔地近一萬七千呎,上蓋大屋實用面積超過六千七百呎,內有七間套房、四個大廳、七個平台、兩個天台,同加埋接近一萬呎嘅前後花園。
壽山村道23A號獨立屋將於下月十五日截標,同日截標嘅,重有另外兩個豪宅。
業主意向價一億四千萬,比九七高峯期購入價高兩成幾。
日本腦炎帶挈炒家
日本腦炎又嚟料,今次輪到海怡半島,二手交投會唔會受影響尚未知,不過,對於一班勇字當頭嘅炒家,可能係另一次執筍貨機會。
今年中,加州花園都爆發過日本腦炎個案,中原龍智烽憶述,當其時,有個別業主即時降低放盤叫價五至十個巴仙,屋苑平均呎價亦即時由三千跌落二千八,吸引到炒家入市。
好似榕翠徑一間雙號屋,六月底炒家入貨價五百六十五萬,個幾月前以六百三十五萬沽出,賺七十萬。𠵱家屋苑呎價已經上番去三千二百幾。
美記今個周日招聘
政府話,好多工冇人做,實情何解有工冇人做,睇怕高官厚祿嘅人,唔會咁易了解。好多人,尤其啱啱畢業嘅後生仔女,都想份工有前途,起碼都搵到錢,坊間一般工種,未必一定啱佢哋口味。
近排以地產行業最吃香,美聯物業今個禮拜日,喺奧海城二期地下,聯同青年協會舉辦招聘日,時間係朝十一至晚七,入職學歷中五或以上,目標係請二百個前線人員。
美聯董事總經理葉潔儀話,地監局數字顯示,十月份持牌經紀接近萬八名,比今年初大增兩成,係二千年以來新高。