澳門知名馬主鄧興強多年來養馬唔少，名下「興圖」、「興列」（已退役）等贏過好多大賽，2012年亦試過派「興盈」（已退役）來港爭港澳盃。

鄧興強公子鄧銘禧自細耳濡目染，漸漸都玩埋一份，到上年中籤成為馬主，做老竇梗係開心，既然咁難得，一係就唔好玩，係玩就要認真啲，於是托佢老友英國冠軍騎師蘇兆輝四圍物色。

最終精挑細選之下，佢花近1000萬買入今日（16日）出賽第八場二班1600米之「興爾」，作為送俾阿仔鄧銘禧禮物，咁大手筆，目的只有一個，贏到大賽齊齊樂在其中。

作為一匹四歲馬，唔使問都知，「興爾」主要目標，係今年三月打吡大賽，可惜進度一般非人力所能控制，鄧氏父子都好明白呢一點，寧願俾時間適應環境，而唔想揠苗助長。

最終「興爾」完全冇跑四歲大賽系列，上兩場之前，練馬師苗禮德同佢哋已經有共識，定咗時間表再出跑今場1600米，到他日完全成熟，先至再諗晉級大展拳腳。

「興爾」兩歲初出兩場只跑位置，到三歲換蘇兆輝即連贏三場，雖然再出2000米二級賽，氣量未養成只得第四，但冇影響評價，亦因為咁，蘇兆輝先推介俾鄧氏父子入貨。

事實上，「興爾」貴為無敵馬王「范高爾」之子，不少歐洲又或在港子嗣如「精明才子」熱夠身已兩Win，「帆哥兒」剛剛又入 Q；「興爾」本身來港前既露過一手，今次小休個半月再來，隨時突圍而出。