【新增回應】
32歲戴夢夢前年同51歲太極Ricky傳出戀情，二人年紀相差近廿年，當時有指戴夢夢搶人夫Ricky，Ricky同老婆Anne仲係同居兼未搞離婚，當時Anne聲稱試過兩次捉姦，最終戴夢夢成功佔領人夫，不過今日有周刊爆戴夢夢同Ricky已經分手幾個月，戴夢夢仲被人影上周二同一個年約40歲嘅中年男過大海去咗銀河酒店嘅賭場玩兩手，二人玩「大細」嘅電子賭枱玩，二人成程又攬腰又黐得好埋，中年男不時摸戴夢夢塊面，尤如熱戀中嘅情侶。

據報道指有問過Ricky，不過得知戴夢夢同中年男過大海，佢即話有嘢做，自己都唔清楚，之後Ricky又再回覆話同戴夢夢分咗手幾個月，周刊又指戴夢夢同Ricky唔似分咗手，之前先一齊出席林敏驄演唱會，而Ricky亦要返大陸打理音樂中心，二人聚少離多，據知情者講戴夢夢仍然追求激情，想男友有啲新意，冇男朋友陪嘅戴夢夢，似乎好怕悶。未知佢同中年男撻著，係唔係真係分咗手，先喺埋一齊，如果唔係，咁Ricky咪即係變「史力加」!?

《蘋果》今日搵過戴夢夢，對於與中佬遊澳門，戴夢夢表示：「其實大家仲了解中，佢係圈外人，唔想講太多！」問到同Ricky現時關係，夢夢就話：「我同Ricky分開咗一段時間。(點解分開？）呢啲就唔答啦，我同佢冇涉及第三者，o依家仲係好好朋友，其實分手前大家有嘗試努力繼續行落去，但最終唔得，大家係和平分手。」