近日風雨不斷嘅自由黨，噚日再爆出震撼黨內外消息，傍晚突然發出新聞稿，黨主席劉健儀宣佈中常委開會後決定重組架構，前主席田北俊擔任新設嘅榮譽主席，同時副主席廿蚊張辭職，前副主席周梁淑怡準備頂上。田少同周太回朝，如何妙手回春，將自由黨起死回生，八方同好多人一樣充滿期待。

揚言要搭番溝通渠道

田二少退黨成為新民黨副主席，好多人以為廿蚊張順番條氣，知情人士卻指實情廿蚊張已經意興闌珊，因為田少兩兄弟得罪晒佢啲飲食界選民老闆，為免再受牽連，所以廿蚊張堅持退下來。周太則話日後會專注地區工作，協助年輕黨員打天下。
田少對八方講，其榮譽主席位噚日已生效，所以未來一段日子佢會多啲講自由黨事務，今次重出江湖，係因為發現有時自由黨在立法會做緊乜，商界、市民唔係好知，而自由黨有時又唔係好知商界點睇佢哋，所以希望以自己嘅商界網絡，搭番好自由黨同商界溝通渠道，特別係有關經濟議題方面，打番通條經脈，希望工商界、市民可以更清楚自由黨嘅立場。
據八方所知，日後田少會參與自由黨立法會議員黨團會議，又會全線開設地區辦事處，即使做唔到梗有一間喺左近，都希望街坊半夜三更都可幫襯；至於日後會否再戰江湖出選立法會，田少稱未諗掂，但佢拍心口話自由黨肯定有人直選立法會，出選嘅一定係有勝算嘅人，絕唔會俾人覺得自由黨冇心玩直選！
有自由黨員透露，上星期四田少宴請黨友到其山頂大屋預祝聖誕節，創黨主席飛哥、前高官鍾逸傑都在場，田少復出是否與此有關，令人無限聯想，而飛哥答應日後為新進黨員「補習」地區工作技巧、策略，肯定加強咗田少復出決心。

元氣大傷如經脈盡斷

另一自由黨人以「經脈盡斷」形容該黨元氣大傷狀況，指早前廿蚊張事件令自由黨與基層決裂，後來田北辰罷食大家樂觸怒商界，自由黨目前兩面不討好，如果今次田少、周太出手都救唔番個黨，明年今日，恐怕自由黨已成歷史名詞。

mailto:[email protected]