韓國JYJ成員朴有天去年先後捲入四宗性侵案，事後被判無嫌疑，但經調查後，警方就以誣告及名譽損毀等嫌疑起訴第二名報案人B小姐。

B小姐喺一審中獲判無罪，但檢方不滿判決而上訴，而B小姐今日就繼續二審，而法院就維持原判，判B小姐無罪。其實B小姐日前已事先張揚會喺今日舉行記者會，當時有傳朴有天原定聽日同南陽乳業家族外孫女黃荷娜結婚，但早前忽然延遲婚期，有傳係因為B小姐今日開記招。

而今日B小姐就喺律師陪同下見傳媒，不過佢話因為之前到法院時被神秘人跟蹤，所以今日開記招就唔畀傳媒拍攝。B小姐喺記者會上維持佢嘅論點，指自己喺唔情願嘅情況與朴有天發生性關係，仲話每日都以淚洗面，亦都想過自殺。B小姐話雖然當時有報警方，但因為擔心外界唔會相信自己，兼又擔心遇到報復，所以最終撤回控訴。

而B小姐嘅律師就指佢哋將會針對喺網絡上嘅惡評提到出起訴。律師喺記者會上再次交代事件經過，指前年12月16號喺酒店工作嘅B小姐同朴有天喺酒店嘅廁所內發生性關係，B小姐覺得朴有天嘅行為係性犯罪，不過朴有天方面就強調係「雙方同意」下發生關係。B限姐喺遭性侵嘅第二日凌晨報警，佢有小心保管咗當時所使用嘅衛生護墊，直到去年6月見到A小姐告朴有天後，B小姐先鼓起勇氣提出起訴。

另外，朴有天所屬事務所今日就回應指，唔滿意今次判決，正考慮上訴，同時亦會對網上惡言採取法律行動。