阿嬌（鍾欣桐）噚日同陳曉東、孫耀威、周麗淇、吳日言、范萱蔚、關楚耀等一班歌手，去南昌西鐵站，幫香港電台舉辦嘅「暖流行動──長者鐵路安全運動2007」主持開幕儀式，大會仲委任阿嬌做行動隊長，孫耀威、陳曉東同周麗淇就做「鐵路安全大使」，佢哋一行十幾人陪住成百位長者，一齊由南昌站坐西鐵去天水圍，向啲長者傳達鐵路安全訊息。
成班歌手自從入行之後都好少搭公共交通工具，所以噚日佢哋都好回味，阿嬌就話年前港島大塞車，佢嘅經理人Mani因為趕時間，就決定唔搭保母車，帶住佢同阿Sa（蔡卓妍）搭地鐵過海，阿嬌話：「我哋冇化妝，啲人唔認得我哋，而且，啲乘客各自做自己嘢，唔會太留意。」

陳曉東車廂艷遇

周麗淇回想讀書年代，她經常搭地鐵，仲有三次遇到發哥周潤發，佢話：「以前我仲未入行，發哥已經係荷李活巨星，當時都有啲驚訝，見到發哥冇擺款，仲同我哋傾偈。」
陳曉東話對上一次搭地鐵已經係5、6年前嘅事，佢話有次喺內地唔見咗回鄉證，被迫由上海坐火車去北京做嘢，由於要喺火車過夜，東東被安排同一個陌生少女共處一個包廂，包廂內只有一張碌架床，東東笑住話：「我叫個女仔瞓上格床，我瞓下面，佢成晚問我係唔係陳曉東，我梗係唔認啦！我喺度睇星星、聽歌同做sit-up，仲做咗500幾下。」對於孤男寡女共處一室，東東又做sit-up，發出撞床聲，會唔會擔心俾人誤會，東東就話：「我好有技巧咁做！」