日本當紅組合嵐嘅33歲成員二宮和也，先後搭上長澤正美、佐佐木希等女星，近日佢被爆秘密發展新戀情，其女友竟然係現年35歲嘅女主播伊藤綾子，更盛傳兩人好事近隨時閃婚，不過尊尼事務所當然唔會輕易放人。

今日出版雜誌《女性Seven》報道，二宮和也12年8月亮相NTV台資訊節目《newevery.》時認識伊藤綾子，不過14年5月，伊藤綾子等一眾美女主播上綜藝節目《VS嵐》先至正式撻着，有指當時雙方交換聯絡後開始私下見面，繼而發展成為情侶。該雜誌亦指，伊藤綾子會定時定候到男友家打掃及下廚，更被拍得多次出入二宮嘅豪宅，可見已發展到半同居嘅親密關係。

二宮同伊藤綾子嘅感情越來越穩定，女方喺Blog上大晒左手嘅戒指，相信就係男友送嘅訂情戒指，伊藤綾子仲帶埋二宮見家長，加上伊藤綾子於去年11月初宣傳個人散文集時，被問到幾時嫁人，佢笑言：「好想呢。有冇人娶呢？」伊藤綾子多次寫Blog暗示拍拖，而且恨嫁亦恨到出晒面，引起唔少二宮Fans不滿，今日更喺網上鬧爆伊藤充滿心計。對於伊藤綾子形象健康亦有學識，未知事務所會否開綠燈讓兩人繼續發展，不過亦有人擔心戀情曝光後，尊尼事務所會向NTV施壓，隨時棄用冇合約在身嘅伊藤。